Kryetari i PD Sali Berisha në fjalën e tij të përnatshme në rrugicën e shpresës është ndalur sërish tek skandali i mbetjeve. Duke komentuar reagimin e sotëm të qeverisë Berisha tha: U deshën tre javë që të flasë Edi Rama, të përpiqet të mashtrojë.
Na e nxirr pak, ku e ke autorizimin e eksportit të mbetjeve të cilat nuk mund të eksportohen kurrë pa autorizim të ministrit.
Lexo ligjin; eksporti i mbetjeve nga Republika e Shqipërisë, i mbetjeve, pra i të gjitha llojeve, lejohet vetëm me autorizim të lëshuar nga ministri.
Autorizimi përmban kërkesat për monitorimin dhe raportimin e transfertave të mbetjeve.
Pra, asnjë nga këto nuk ekziston sepse është trafik i mirëfilltë i yti. Njeri që nuk ngurron të angazhohesh në çdo veprimtari ilegale. Të rrezikosh jetën e qytetarëve, të shkelmosh reputacionin e Shqipërisë, vetëm e vetëm që të pasurohesh ditë e natë, duke i bërë keq çdo shqiptari, duke vjedhur çdo shqiptar, duke vjedhur e rrënuar Shqipërinë.- përfundoi ai.
Qëllimisht ose jo kryetari i PD harron faktin se mbetjet nuk janë deklaruar si toksike as nga prodhuesi KURUM dhe as nga eksportuesi Sokolaj shpk. Kjo nuk i zhvesh insitucionet shqiptare nga përgjegjësia, por sigurisht që hallkë e zinxhirit pérgjegjës ështe dhe prodhuesi dhe eksportuesi i mbetjeve.
