Elon Musk do të largohet nga posti i tij në Departamentin e Efiçencës Qeveritare (DOGE) sipas planit këtë pranverë, pasi të ketë përfunduar “puna e tij e jashtëzakonshme” në këtë institucion, konfirmoi të mërkurën Shtëpia e Bardhë.
“Kjo ‘ekskluzive’ është e pavlerë,” shkroi në X sekretarja e shtypit e Shtëpisë së Bardhë, Karoline Leavitt. “Elon Musk dhe Presidenti Trump kanë deklaruar publikisht se Elon do të largohet nga shërbimi publik si punonjës i veçantë i qeverisë sapo të përfundojë puna e tij e jashtëzakonshme në DOGE.”
Leavitt iu referua një artikulli të Politico të publikuar të mërkurën, ku thuhej se “Trump u ka thënë njerëzve të tij të ngushtë dhe anëtarëve të kabinetit se” Musk “do të tërhiqet në javët e ardhshme nga roli i tij aktual.” Megjithatë, prej kohësh pritej që Musk të largohej nga DOGE në maj, kur të përfundojnë 130 ditët e tij si “punonjës i veçantë i qeverisë.”
Musk ka qenë figura publike e DOGE që prej 20 janarit, kur Presidenti Donald Trump nënshkroi një urdhër ekzekutiv për krijimin e këtij departamenti.
