Një shpërthim i fuqishëm është regjistruar mëngjesin e sotëm në karburantin “EiDA”, në zonën e Brrylit në Tiranë, duke shkaktuar plagosjen e tre punonjësve dhe dëme të mëdha materiale.
Sipas informacioneve paraprake, dyshohet se shpërthimi është shkaktuar nga një bombol gazi në ambientet ku furnizohen automjetet. Si pasojë e forcës së shpërthimit është shembur një godinë njëkatëshe e karburantit.
Në momentin e ngjarjes, në pikën e karburantit ndodhej edhe një automjet që po furnizohej me gaz. Deri tani nuk dihet nëse ka persona të tjerë të dëmtuar.
Tre punonjësit e plagosur janë transportuar në spital dhe po marrin ndihmë mjekësore, ndërsa ende nuk ka informacion zyrtar për gjendjen e tyre shëndetësore.
Policia ka bllokuar unazën dhe banorët nuk lejohen edhe për ca të hyjnë në banesa. Po ashtu as punonjësit e institucioneve përreth
Shpërthimi shkaktoi panik te banorët dhe kalimtarët e zonës. Shërbimet e emergjencës dhe autoritetet ndodhen në vendngjarje, ku po punojnë për të përcaktuar shkakun dhe rrethanat e plota të incidentit.
Njoftimi
Tiranë/Informacion paraprak
Tek “Brryli”, në një karburant, dyshohet se ka shpërthyer një bombul gazi, gjatë kohës që po furnizohej me karburant një automjet.
Si pasojë, janë dëmtuar 3 persona, punonjës të karburantit, të cilët janë dërguar në spital për mjekim, jashtë rrezikut për jetën.
Grupi hetimor vijon punën për sqarimin e rrethanave të rastit.
