Administrata e Gjykatës së Tiranës, Dhoma Civile, ka nisur bojkotin për shkak të mosmarrjes së pagave të muajit gusht. Situata ka prekur punonjësit e sistemit të drejtësisë, përfshirë stafin administrativ, pasi pagat rezultojnë të bllokuara në Thesar.
Çështja lidhet edhe me vendimin e Gjykatës Kushtetuese të muajit shkurt, i cili detyronte qeverinë të përllogariste pagat e gjyqtarëve brenda 31 korrikut. Megjithatë, vendimi ende nuk është zbatuar nga Kuvendi.
Bojkoti është shtrirë edhe në Gjykatën e Apelit, ku administrata ka ndërprerë punën për të njëjtën arsye. Punonjësit kanë pezulluar shërbimet dhe kërkojnë sqarime lidhur me vonesën e pagave të gushtit, si dhe për mënyrën se si pritet të zgjidhet situata.
Administrata ka njoftuar kryetarin e Gjykatës së Tiranës për bojkotin, ndërsa punonjësve u është bërë e ditur se një qëndrim pritet pas mbledhjes së kryetarëve të të gjitha gjykatave. Takimi do të zhvillohet sot, në orën 15:00, në Gjykatën e Lartë.
Ndërkohë, situata e pagave pritet të diskutohet edhe në sistemin e prokurorisë. Prokurori i Përgjithshëm, Olsian Çela, ka thirrur në një takim drejtuesit e prokurorive të rretheve, përfaqësues të Shoqatës së Prokurorëve dhe anëtarët e Këshillit të Lartë të Prokurorisë.
