Një aksident i rëndë rrugor është shënuar mëngjesin e kësaj të hëne në autostradën Durrës-Tiranë, ku janë përfshirë pesë automjete. Ngjarja ka ndodhur rreth orës 05:20 dhe ka shkaktuar një viktimë, ndërsa pesë persona të tjerë kanë mbetur të plagosur.
Sipas informacionit paraprak të Policisë, shtetasi H. B., 45 vjeç, është përplasur me një kamion. Si pasojë e përplasjes, 45-vjeçari ka humbur jetën në vendngjarje.
Pas përplasjes së parë, në aksident janë përfshirë edhe tre automjete të tjera, me drejtues shtetasit G. L., 59 vjeç dhe J. I., 34 vjeç, si dhe pesë pasagjerë. Të plagosurit janë transportuar për ndihmë mjekësore dhe, sipas të dhënave paraprake, ndodhen jashtë rrezikut për jetën.
Ndërkohë, shtetasja A. V., e cila dyshohet se drejtonte një prej automjeteve të përfshira në aksident, është larguar nga vendngjarja, por më pas është shoqëruar nga Policia për të dhënë sqarime lidhur me rrethanat e ngjarjes.
Në vendngjarje kanë mbërritur grupi hetimor dhe shërbimet e Policisë, të cilat po kryejnë veprimet e nevojshme për dokumentimin e plotë të aksidentit dhe përcaktimin e shkaqeve dhe dinamikës së tij.
