Sot në Tropojë nuk ndodhi thjesht një "incident në punë", por një tragjedi e paralajmëruar nga neglizhenca dhe braktisja e çdo rregulli të sigurisë teknike. Një punonjës i Bashkisë, Muhamet Sylisufaj, 59 vjeç, humbi jetën në krye të detyrës, ndërsa tre kolegë të tij, Albert Dunisha, Ilir Dautaj dhe Afrim Aliaj, ky i fundit vetëm 21 vjeç, mbetën të plagosur pasi ranë në kontakt me rrymën elektrike. Nga të dhënat e para të policisë, rezulton se punonjësit ishin duke vendosur shtyllat e ndriçimit, kur njëra nga prej tyre ka rënë duke prekur telat e linjës së tensionit të lartë.
Por pas këtij përshkrimi të ftohtë zyrtar fshihet një realitet skandaloz, ku jeta e punëtorëve të thjeshtë peshon më pak se nxitimi për të përmbyllur një tender.
Në prill të këtij viti, Bashkia e Tropojës bleu mbi 100 shtylla ndriçimi rrugor me një vlerë prej 10 milionë lekësh të vjetra, përmes një procedure blerjeje me vlerë të vogël. Tenderi u fitua nga subjekti "MARJO – MONDI" me një ofertë prej 6.6 milionë lekësh të vjetra, për shtylla metalike 8-metërshe të formës konike.
Por ajo që duhej të ishte një investim për ndriçimin e qytetit u kthye në një kurth mortor, sepse bashkia zgjodhi rrugën më të shkurtër e më të lirë. Në vend që të angazhonte kompani të specializuara, mjete të përshtatshme mbrojtëse apo inxhinierë përgjegjës në terren, detyroi punonjësit e saj të shërbimeve të bëjnë një punë për të cilën nuk kishin as mjetet e nevojshme, as kualifikimin e duhur e as mbrojtjen minimale.
Pamjet nga vendi i ngjarjes dëshmojnë se shtyllat metalike po ngriheshin drejtpërdrejt poshtë telave të linjës së tensionit të lartë, në shkelje flagrante të çdo normative të sigurimit teknik. Punëtorët e shërbimit, të pakualifikuar dhe me asnjë mjet mbrojtës u dërguan të bëjnë një punë që nuk janë specialiszuar për ta bërë. Për më tepër, në njoftimin e policisë thuhet se punonjësit po e mbanin shtyllën gjigante prej me se 8 metrash me krahë, në vend që të përdorej makineria e specializuar e ngrritjes që kërkohet me ligj për instalime të tilla.
“4 punonjësit që po e mbanin kanë humbur ekuilibrin dhe shtylla ka prekur telat e rrymës, duke përcjellë energjinë elektrike te punonjësit”, thueht në njoftimin e policisë.
Kjo ngjarje nuk mund dhe nuk duhet të kalojë si një raportim i zakonshëm kronike apo si një "fat i keq". Policia dhe prokuroria kanë për detyrë të shkojnë përtej njoftimit të parë dhe të vënë përpara përgjegjësisë penale ata që dhanë urdhrat.
Kryetari i Bashkisë Tropojë, Rexhë Byberi, së bashku me vartësit e tij përgjegjës, duhet të japin llogari publike dhe ligjore përse i detyruan punonjësit e shërbimeve publike të kryejnë punë të rrezikshme pa asnjë siguri. Sepse këtu nuk bëhet fjalë për një numër më shumë në letrat e një tenderi, por për një jetë të humbur dhe tre të tjerë të gjymtuar në emër të papërgjegjshmërisë zyrtare.
