Planet që samiti i ardhshëm i NATO-s të zhvillohet në Shqipëri në vitin 2027 janë vënë në dyshim, për shkak të hezitimit të administratës së presidentit amerikan Donald Trump dhe pakënaqësisë së disa vendeve anëtare me nivelin e ulët të shpenzimeve shqiptare për mbrojtjen. Sipas Reuters, draft-deklarata e samitit që do të mbahet javën e ardhshme në Ankara nuk përmend më Shqipërinë si vendin pritës të samitit pasues, ndonëse kjo ishte parashikuar në deklaratën e miratuar një vit më parë.
Burime diplomatike bëjnë të ditur se aleatët evropianë po përpiqen të shmangin përplasjet me Trump-in, duke treguar përparim në rritjen e buxheteve të mbrojtjes. Një prej burimeve tha se, nëse NATO do të zhvillonte samitin në Shqipëri pa arritur vendi objektivat e kërkuara për shpenzimet ushtarake, kjo mund të shkaktonte reagim negativ nga presidenti amerikan dhe publicitet të pafavorshëm për aleancën.
Qeveria shqiptare deklaroi për Reuters se draftet nuk përbëjnë vendime përfundimtare dhe se po finalizon masat fiskale për të përmbushur angazhimet e NATO-s. Sipas saj, shpenzimet për mbrojtjen dhe sigurinë në vitin 2026 do të arrijnë në 2.6% të Prodhimit të Brendshëm Bruto, ku 2.2% do të jetë për mbrojtjen bazë dhe 0.4% për masa të tjera të lidhura me sigurinë. Edhe pse disa diplomatë besojnë se Shqipëria mund ta presë ende samitin, vendimi përfundimtar pritet të merret në muajt në vijim.
