Ndërsa thirrjet “Rama n’burg, Berisha n’burg” u zhvendosën sot para Parlamentit, kryeministri dhe kreu i opozitës zgjodhën që të mos paraqiten në seancën plenare, duke shmangur përballjen direkte me pakënaqësinë e qytetarëve. Megjithatë, mungesa fizike në sallë nuk i pengoi ata që ta vazhdonin protagonizmin e tyre përmes rrjeteve sociale. Të dy liderët zgjodhën Facebook-un si arenën e tyre kryesore për të komentuar dhe interpretuar zhvillimet e protestës sipas interesave të tyre politike.
Kryeministri Edi Rama zgjodhi një strategji të vjetër të propagandës duke publikuar mesazhe të pretenduara si të ardhura nga grupe WhatsApp-i të vetë protestuesve. Përmes një narrative që ngjan më shumë me skenarë të trilluar, ai u mundua të tregonte se si një protestues "në arrati" e cilësonte atë si "të keqen më të vogël" dhe i kërkonte të mos jepte dorëheqjen. Duke i quajtur kërkesat e qytetarëve si "ondrra n’beze" të një "rrace derri" që kërkon pushtet, Rama zgjodhi të sulmojë dhe të zhvlerësojë revoltën duke u fshehur pas analizave të gjata taktike të dërguara nga numra anonimë.
Nga ana tjetër, kreu i opozitës Sali Berisha aplikoi të njëjtën taktikë të dëgjimit selektiv, duke mbyllur plotësisht veshët ndaj thirrjeve të protestuesve që kërkonin edhe largimin e tij nga politika. Berisha u fokusua te denoncimi i "egërsisë shtazore" të Policisë së Shtetit dhe arrogancës së qeverisë ndaj qytetarëve. Ndërsa në rrugë kërkohej largimi i të dy palëve, kryetari i opozitës pa vetëm dhunën policore, duke injoruar faktin se një pjesë e revoltës i drejtohej pikërisht atij dhe klasës politike që ai përfaqëson.
Seanca e sotme dëshmoi qartë se si dy figurat kryesore të politikës shqiptare preferojnë komoditetin e zyrave dhe ekraneve të telefonit përpara përballjes me realitetin e sheshit që kërkon largimin e tyre si kusht të panegociueshëm.
