Ashtu siç e kishin paralajmëruar në protestën e mbrëmjes së djeshme, qytetarët kanë protestuar paraditen e sotme përpara Parlamentit. Ata u mblodhën pak para se të niste seanca plenare dhe e shoqëruan hyrjen e deputetëve me thirrjet “Parlament i krimit, parlament analfabet”, ndërsa nuk kursyen as përfaqësuesit e opozitës me thirrjet “opozitë e shitur”. Thirrjet e lshuara në kor si “Edi Rama jep dorëheqjen” dhe “Rama në burg, Berisha në burg”, duket se ishin arsyeja pse sot në Parlament nuk u paraqit as kryeministri dhe as kreu i PD-së.
Protesta nisi e qetë, ku qytetarët zhvendoseshin në të dyja hyrjet e Parlamentit. Tensioni filloi kur disa prej protestuesve morën një kosh mbeturinash dhe tentuan ta fusnin në hyrje të Kuvendit, veprim i cili u ndalua nga forcat e policisë. “Këtu e keni vendin”, “Parlamenti në kosh!” si dhe “Rama n’kosh, Berisha n’kosh”, ishin disa prej thirrjeve të forta që erdhën nga ana e protestuesve në ato momente.
Gjatë protestës, disa të rinj zgjodhën të lënë mesazhin e tyre duke vendosur fleta gjobash në makinat e deputetëve të parkuara në rrugët afër Parlamentit. Ata deklaruan se ky ishte një mesazh kundër standardit të dyfishtë me të cilin vepron policia, ku makinave të qytetarëve të parkuara anash rrugëve u vendosen gjoba, ndërsa atyre të deputetëve jo. “Jemi kundër dy standardeve. Nuk duhet të procedohen studentët, ndërsa makinat bllokojnë rrugët e Tiranës, bllokojnë trafikun. Jemi në protestë dhe i kemi të qarta kërkesat. Gjoba deputetëve dhe mos procedoni studentët”, u shprehën ata.
Protestuesit u revoltuan më tepër kur deputetët nisën të dilnin nga seanca plenare, moment në të cilin filloi gjuajtja drejt tyre me vezë. Ata nuk kursyen as makinat kur deputetët dhe ministrat po largoheshin nga oborri i Parlamentit. Kjo situatë bëri që policia të shtohet në numër, duke zbritur në terren edhe Forcat e Ndërhyrjes së Shpejtë. Këta të fundit krijuan një kordon për të hapur rrugën e makinave të deputetëve duke u shtyrë me protestuesit, ndërsa këta të fundit vazhdonin të qëllonin me vezë.
Situata u përshkallëzua edhe më tej kur protestuesit hodhën vezë ndaj makinës së deputetit Erion Braçe. Në këtë moment policia ndërhyri dhe pas përplasjeve arrestoi disa protestues, mes të cilëve edhe aktivistin Dritan Goxhaj.
Kjo bëri që protestuesit të zhvendosnin tubimin para godinës së Drejtorisë së Policisë Tiranë, nga ku kërkuan lirimin e menjëhershëm të të ndaluarve, të cilët sipas tyre u tërhoqën zvarrë nga policia.
Qytetarët vazhdojnë të qëndrojnë aty, ndërsa vlen të theksohet se kjo ishte përplasja e parë mes policisë dhe qytetarëve pas 30 ditësh protestë. Ende nuk është bërë zyrtare nëse do të ketë përshkallëzim të mëtejshëm të tubimeve, por e sotmja ishte një sinjal i parë.
Kujtojmë se pasditen e sotme, në orën 19:00 do të mbahet protesta e 31-të radhazi, ku qytetarët kërkojnë rrëzimin e qeverisë dhe dorëheqjen e kryeministrit Edi Rama.
