Anëtari i Kryesisë së PD-së, Aldo Bumçi, ka deklaruar se teza sipas së cilës Partia Socialiste dhe Partia Demokratike janë njësoj është, sipas tij, një narrativë që i shërben kryeministrit Edi Rama dhe njëkohësisht përdoret nga partitë e vogla për të ndërtuar kapital politik.
I ftuar në emisionin “Off the Record” në A2 CNN, Bumçi tha se nuk mund të barazohet një forcë politike që ka qeverisur vendin për 13 vite me opozitën, e cila, sipas tij, nuk ka pasur pushtet dhe për një periudhë u përball edhe me humbjen e emrit dhe simboleve të saj.
Sipas tij, partitë e vogla përpiqen të ndërtojnë mbështetje politike mbi tezën se “të gjithë janë njësoj”, por kjo, tha ai, nuk sjell një alternativë të re.
Bumçi tregoi gjithashtu se ka biseduar me protestues që thërrisnin “Rama në burg, Berisha në burg”, duke theksuar se shumica e tyre ishin të rinj, të cilët, sipas tij, kanë qenë fëmijë gjatë periudhës kur qeveriste PD-ja dhe nuk e mbajnë mend atë periudhë.
Ai shtoi se gjatë viteve 2005-2013 në Shqipëri funksiononte rotacioni politik, mediat ushtronin kontroll ndaj qeverisë dhe Gjykata Kushtetuese rrëzonte ligje të miratuara nga mazhoranca, duke e cilësuar atë periudhë të ndryshme nga situata aktuale.
