Deputeti i PS-së, Pirro Vengu, deklaroi se sipas tij tashmë janë identifikuar si përfituesit, ashtu edhe sponsorizuesit e protestave.
I ftuar në emisionin “Off the Record” në A2 CNN, Vengu u shpreh se përfituesit janë forca politike që, sipas tij, synojnë të kapitalizojnë zemërimin e qytetarëve, ndërsa sponsorizuesit janë ata që investojnë në rritjen e këtij zemërimi përmes lajmeve të rreme, përhapjes së informacionit të pavërtetë, dëmtimit të aseteve publike dhe shtimit të tensioneve.
Sipas deputetit socialist, bëhet fjalë për forca politike që përfaqësohen edhe në Kuvend. Ai akuzoi disa kolegë deputetë se delegjitimojnë administratën dhe përdorin një gjuhë që nxit linçimin.
Duke iu referuar incidenteve të ndodhura gjatë protestës së sotme, Vengu tha se gjuha e përdorur në debat ka pasoja konkrete, ndërsa dënoi sulmet fizike ndaj dy deputeteve, të cilat, sipas tij, nuk kanë mbajtur asnjëherë poste ekzekutive.
