Kryeministri Edi Rama është përballur me protesta gjatë vizitës së tij në Düsseldorf të Gjermanisë, ku zhvilloi një takim me Kryeministrin e Landit Nordrhein-Westfalen, Hendrik Wüst.
Në momentet e para të takimit, një grup shqiptarësh protestues u mblodhën pranë vendit ku ndodhej Rama, duke mbajtur flamuj kombëtarë, pankarta dhe duke thirrur slogane që kërkonin dorëheqjen e tij.
Protestuesit shprehën kundërshtimin ndaj politikave dhe ligjeve që, sipas tyre, favorizojnë privatizimin e pasurive publike. Ata kërkuan gjithashtu largimin e kryeministrit, në të njëjtën frymë me protestat që po zhvillohen në Tiranë.
Kjo është hera e dytë brenda pak javësh që Rama pritet me protesta nga shqiptarët e diasporës. Më herët, një situatë e ngjashme u regjistrua edhe gjatë vizitës së tij në Basel të Zvicrës, në kohën kur në Tiranë kishin nisur protestat masive.
