Kryeministri i Shqipërisë, Edi Rama, ka reaguar me ironi ndaj kallëzimit të depozituar në SPAK nga protestuesit për librin “The Albanian Files”.
Përmes një postimi në rrjetet sociale, Rama e cilësoi veprimin si absurd dhe e quajti librin “Libri i Mallkuar”, duke ironizuar faktin që ai po trajtohet si provë kriminale.
“LIBRI I MALLKUAR së shpejti në ‘Adrion’, pasi sapo hyri sot në histori si i pari libër që trajtohet si provë krimi 80 vjet pas rënies së nazizmit dhe 35 vjet pas rënies së komunizmit”, shkroi Rama.
Më herët, protestuesit dorëzuan në SPAK librin “The Albanian Files”, duke pretenduar se ai përmban prova për afera korruptive që lidhen me qeverinë.
Sipas tyre, libri përfshin 523 projekte të ndërtuara, në proces ndërtimi ose të planifikuara, për të cilat kërkohet hetim nga organet e drejtësisë. Aktivistët i bënë thirrje SPAK-ut të verifikojë përmbajtjen e publikimit dhe përgjegjësit e mundshëm që lidhen me këto projekte.
