Kryeministri Edi Rama ka reaguar me tone të ashpra pas incidentit të ndodhur në Bashkinë e Pustecit, ku gjatë një aktiviteti me praninë e përfaqësuesve zyrtarë nuk u luajt himni kombëtar shqiptar. Përmes një postimi në rrjetet sociale, Rama e cilësoi ngjarjen si një “parodi domethënëse për botëkuptimet tona të ndryshme në këtë lagje të Europës”, ndërsa vlerësoi qëndrimin e kryetarit të bashkisë, Pali Kolefski.
Rama theksoi se Kolefski u tregua një “shtetar dhe qytetar i denjë i Shqipërisë Europiane” kur kërkoi ndjesë pasi kërkesa e tij për luajtjen e himnit shqiptar u injorua.
I ndalur te prania e figurave apo grupeve të caktuara politike nga jashtë kufijve, kreu i qeverisë e ironizoi situatën duke e quajtur atë një shfaqje kalimtare të nacionalizmit të vjetruar:
Për organizatorët e aktivitetit: “Tani, kjo ardhja e herëpashershme në territorin tonë e trupave të cirkut të nacional-folklorizmit ballkanik, herë nga një vend, herë nga një tjetër... nuk se na shqetëson për vete, për sovranitetin e Shqipërisë jo e jo.”
Mbi sovranitetin dhe stabilitetin: “Nuk ka mushkë Troje të rritur në kodrat tona apo ‘diasporë’ të eksportuar nga brenda lagjes sonë që na lëkund.”
Mesazhi për reagimet patriotike brenda vendit: “Mëmëdhetarëve mes nesh që në kësi rastesh hidhen përpjetë përpara pasqyrave të tyre digjitale... u them: Jo, Shqipëria, Europa e Ballkanit, kurrsesi nuk mund t’ia lejojë dhe nuk do t’ia lejojë vetes ta zbresë monedhën e vlerave të saj në nivelet e parodisë së Pustecit.”
Kryeministri nënvizoi se minoritetet në Shqipëri nuk janë thjesht statistikë apo numra, por “pasuri kombëtare” dhe vëllezër e motra me të drejta të barabarta, duke garantuar se Shqipëria do të vazhdojë të ruajë lartësinë e vlerave të saj europiane kundrejt provokimeve politike.
