Edi Rama i ka ngritur sot stekën politike teksa i është përgjigjur Gazment Bardhit për kërkesën e këtij të fundit që kryeministri të vijë urgjent në seancë plenare. Në fakt, tingëllon pak e çuditshme që Rama t’i përgjigjet me një tekst të gjatë një kërkese dhe akuze të përsëritur të Bardhit, ndërkohë që atij normalisht duhet ti përgjigjet Niko Peleshi. Të dy kryetarët respektivë të grupeve më të mëdha në parlament janë në pozita të njëjta për të shkëmbyer akuza dhe debate. Por me gjasë, si nervangritës për Berishën, kryeministri ka zgjedhur të merret me kryetarin e grupit parlamentar demokrat, duke përzgjedhur për kryetar të PD Gaz Bardhin.
Në çdo rast tjetër ky i fundit nuk do e kishte lënë pa përgjigje Edi Ramën. Por, i rënë në kurthin e Ramës dhe ndoshta në presionin e Berishës, Gazment Bardhi ka zgjedhur të heshtë dhe të lërë pa përgjigje deklaratën direkte të Edi Ramës për të. Jo krejt rastësisht edhe në takimin e mëvonshëm në selinë e PD, kryetari i vërtetë i saj as nuk e përmendi përgjigjen e Ramës dhe as i la hapësirë Gaz Bardhit ta bëjë një gjë të tillë.
Loja e “kryetarëve” të partisë që Edi Rama po luan me PD është bezdisëse pa masë për Sali Berishën. Ky i fundit, prej gati 3 vitesh, po përpëlitet për të legjitimuar pozicionin e tij. Dhe ndoshta, pas Bashës, betejën e radhës do e ketë me Gaz Bardhin… dhe begenisjen e Edi Ramës.
