Radhë të gjata janë krijuar gjatë dy ditëve të fundit pranë portit të Santorinit, ndërsa mijëra qytetarë, turistë dhe të punësuar po kërkojnë të largohen përkohësisht për shkak të aktivitetit sizmik të vazhdueshëm dhe intensiv që ka përfshirë ishujt e Kykladës.
Sipas autoriteteve greke, nga 6,000 deri në 9,000 persona, përfshirë edhe pjesëtarë të komunitetit shqiptar, janë larguar tashmë nga ishulli. Kompanitë ajrore dhe ato detare kanë shtuar fluturimet dhe lundrimet drejt Athinës dhe Pireut për të përballuar fluksin e madh të njerëzve. Ndërkohë, qindra banorë kanë kaluar netët e fundit duke fjetur në makinat e tyre, nga frika e lëkundjeve të tjera.
Vetëm në tre ditët e fundit janë regjistruar mbi 555 tërmete, ku më i fuqishmi ka arritur magnitudën 4.9 të shkallës Rihter. Lëkundjet kanë vijuar edhe sot në mëngjes, me dy tërmete të tjera me magnitudë 4.7 dhe 4.8 Rihter. Situata është duke u monitoruar nga afër nga autoritetet sizmologjike dhe ato të mbrojtjes civile.
