Një moto, e shkurtuar në akronimin MEGA, që i bën jehonë sloganit “Make America Great Again”, i cili u bë simbol i fushatës së parë elektorale të ish-presidentit amerikan Donald Trump. Tani, ai që dëshiron ta “bëjë Evropën të madhe përsëri” është Elon Musk, miliarderi dhe pronari i SpaceX, i cili, pasi luajti një rol të rëndësishëm në zgjedhjet e fundit në SHBA përkrah Trumpit, ka ndërhyrë fuqishëm edhe në çështjet evropiane – nga zgjedhjet në Gjermani deri te kundërshtimi i politikave të qeverisë në Mbretërinë e Bashkuar. Për ta realizuar këtë, Musk ka shpallur nga platforma e tij X nisjen e një lëvizjeje të re. “Populli i Evropës: bashkohuni me lëvizjen MEGA”, shkroi ai, pa dhënë ende detaje të mëtejshme. Provokime ndaj Evropës Projekti i ri i mundshëm politik i Elon Musk mund të bëhet baza për të formësuar idetë e tij dhe për të ndërhyrë gjithnjë e më shumë në dinamikat e Kontinentit të Vjetër. Prej disa muajsh, që nga fitorja e Trump në zgjedhjet e nëntorit, themeluesi i Tesla-s është shfaqur si krahu i djathtë, “shoku i parë”, i presidentit të ri dhe nuk ka humbur asnjë rast për të shprehur opinionet e tij. Provokime të cilat shpeshherë janë kontestuar nga qeveritë evropiane. Për shembull, gjatë fushatës elektorale në Gjermani, mbështetja e tij për partinë ekstremiste AfD dhe lideren e saj, Alice Weidel, shkaktoi reagime të forta. Po aq destabilizuese ishin edhe akuzat e tij kundër qeverisë laburiste britanike, ku kryeministrin Keir Starmer e etiketoi si një “qenie të neveritshme”. Më tej, propozimi për të riemëruar Kanalin e La Manshit në “Kanalin George Washington” apo gjesti i interpretuar si përshëndetje naziste gjatë ceremonisë së inaugurimit të Trump-it, kanë shkaktuar shumë polemika.
