Ministria e Brendshme e Italisë ka nisur procedurat për të apeluar në Gjykatën e Kasacionit pas një vendimi të seksionit të imigracionit të gjykatës së Romës, i cili refuzoi ndalimin e 12 emigrantëve në qendrën e paraburgimit italian në Gjadër, Shqipëri. Çështja e ngritur lidhet me moszbatimin e ligjit italian për vendet e sigurta. Ky hap vjen pas një dekreti të qeverisë italiane që synon të adresojë çështjen e vendeve të sigurta.
Sipas TGCom, Ministria e Brendshme reagoi pas polemikave që shkaktoi vendimi i Gjykatës së Romës. Më 18 tetor, gjyqtarja Silvia Albano kërkoi kthimin e këtyre emigrantëve në Itali, edhe pse atyre iu ishte refuzuar kërkesa për azil. Për të zgjidhur këtë situatë, qeveria italiane shpalli “dekretin për Shqipërinë”, i cili përcakton 19 vende si të sigurta, duke përjashtuar Kamerunin, Kolumbinë dhe Nigerinë.
Në listën e vendeve të sigurta sipas dekreti përfshihen: Shqipëria, Algjeria, Bangladeshi, Bosnje-Hercegovina, Kepi i Gjelbër, Bregu i Fildishtë, Egjipti, Gambia, Gjeorgjia, Gana, Kosova, Maqedonia e Veriut, Maroku, Mali i Zi, Peruja, Senegali, Serbia, Sri Lanka dhe Tunizia. Gjykata e Romës ndaloi deportimin e emigrantëve nga vende që nuk konsiderohen të sigurta, duke lejuar që 12 emigrantët nga Egjipti dhe Bangladeshi të dërgoheshin në Itali.
