Duke komentuar kaosin e para disa ditëve në Kuvend, kryetari i “Shqipëria bëhet”, Adriatik Lapaj, tha se maxhoranca dhe opozita sipas tij bëjnë sikur zihen, por bëhen bashkë për interesa.
“Këta bëjnë sikur zihen dhe bëhen bashkë për interesa. U bënë bashkë dhe amnistuan të korruptuarit, që ishin dënuar nga SPAK. U bënë bashkë për Kodin Zgjedhor, që ta mbajnë peng. U bënë bashkë për rritjen e rrogave, nga 1.5 milionë lekë të vjetra i çuan 3 milionë. Nuk bëhen bashkë për rritjen e pagave të qytetarëve ose pensionet. Kjo është strategji për të mbajtur dualitetin” - tha ai.
Ndërsa sa i përketë arrestimit të Salianjt, Lapaj tha se deputeti demokrat është tradhëtuar nga Partia Demokratike.
“Po të ziheshin për Salianjin, do ziheshin përpara se të jepej vendimi. Salianji është i tradhtuar nga kjo betejë nga PD. Atë e tradhtoi gjithë partia e vet. Kur ai bënte betejën, ata ziheshin se kush merrte ndonjë pozicion. Më vjen keq për Ervin Salianjin, se e njoh, është djalë luftarak”, tha Lapaj.
