Pas marshimit në qendër të Tiranës, protestuesit u mblodhën në sheshin “Skënderbej”, ku diskutuan mbi vijimin e protestës. Mes tyre pati debate për hapat e radhës, ku një pjesë kërkoi të rikthehej në mbrëmje për protestën e paralajmëruar, ndërsa të tjerë propozuan marshimin drejt Komisariatit nr. 1.
Në fund, një grup protestuesish u nis drejt Komisariatit nr. 1, ku dyshohet se mbahen personat e shoqëruar gjatë përplasjeve të paradites, duke kërkuar lirimin e tyre.
Ndërkohë, organizatorët kanë bërë thirrje që protesta të vijojë sërish në orën 19:00, me një tjetër grumbullim në qendër të Tiranës.
Më herët, që prej orës 08:30, qytetarët u grumbulluan pranë Kuvendit, ndërsa seanca plenare nisi në orën 10:00. Policia kishte vendosur masa të shtuara sigurie dhe një perimetër rreth godinës së Kuvendit për të penguar afrimin e protestuesve dhe për të shmangur tensionet gjatë hyrjes së deputetëve në seancë.
