Janë bërë publike emrat e pesë personave të shpallur në kërkim për ngjarjen që ndodhi në Astir, Tiranë. Burime të besueshme konfirmojnë se ata janë: Skerdi Sina, Ogert Alia, Joni Sadikaj, Arnold Jaho dhe Anduel Alia.
Po ashtu, tre vajza janë pyetur lidhur me ngjarjen, përfshirë një 21-vjeçare që ka pohuar se është mbyllur me forcë në banesë. Në mesin e personave që morën pjesë në festën e organizuar para ngjarjes, ka qenë edhe një avokate, e cila ka treguar se festa kishte përfshirë përdorimin e alkoolit dhe dyshohet se ishte konsumuar edhe kokainë. "Shoqja humbi vetëdijen nga alkooli", ka pohuar avokatja.
Policia e Tiranës, me urdhër të Prokurorisë, ka shpallur në kërkim pesë të rinjtë e dyshuar lidhur me ngjarjen e Astirit, ku një 20-vjeçare, e cila ishte mbyllur në një banesë, ka alarmuar forcën speciale të policisë. Personat e shpallur në kërkim janë identifikuar nga kamerat e sigurisë të pallatit.
Sipas burimeve, të rinjtë janë nga qyteti i Vlorës dhe kanë precedentë penalë. Ata dyshohet se sollën kokainën me të cilën u festua një natë më parë. Po ashtu, gjurmët e tyre janë gjetur në një pistoletë me silenciator.
Një akt ekspertize është kryer mbi trupin e 21-vjeçares, por deri tani nuk janë gjetur shenja dhune. Ajo ka pasur lidhje me një nga djemtë, të cilin babai i saj nuk e ka miratuar. Sipas kamerave të sigurisë, vajza ka shkuar në banesën e marrë me qira nga ata, ku dhe ka qëndruar. Oficerët e policisë dyshojnë se, për shkak të gjendjes së saj nën ndikimin e alkoolit dhe drogës, miqtë e saj mund të kenë mbyllur përkohësisht në banesë dhe po hetohen për mundësinë e ngritjes së akuzës për heqje të paligjshme të lirisë.
Hetimet janë në vazhdim dhe priten zhvillime të tjera.
