Tensionet politike rikthehen në sallën e Kuvendit, ku debati mes mazhorancës dhe opozitës për raportimin e Avokatit të Popullit për vitin 2025 degradoi në përplasje të forta verbale dhe ndërprerje të seancës plenare.
Opozita kundërshtoi zhvillimin e kësaj pike të rendit të ditës, duke pretenduar se Avokati i Popullit, Endri Shabani, është zgjedhur në mënyrë të paligjshme dhe se nuk duhet të paraqiste raportin përpara deputetëve. Kreu i grupit parlamentar të Partisë Demokratike, Gazment Bardhi, dhe sekretari i grupit, Flamur Noka, i kërkuan kryetarit të Kuvendit, Niko Peleshi, ndryshimin e rendit të ditës dhe kalimin direkt te diskutimet.
“Ta kalojmë menjëherë në diskutime. Ai është zgjedhur në mënyrë të paligjshme, është ilegjitim”, deklaruan përfaqësuesit e opozitës.
Kërkesa u refuzua nga kryeparlamentari Peleshi, i cili argumentoi se raportimi është pjesë e procedurës parlamentare dhe se Kuvendi nuk mund të refuzojë një institucion të zgjedhur nga vetë ai.
“Nuk jemi këtu për përleshje, por për të përplasur mendimet dhe jo kokat. Diskutimet bëhen mbi raportin, nuk mund të diskutojmë në ajër. Avokati i Popullit është votuar nga ky Kuvend dhe ndryshe do të ishim në shkelje të Kushtetutës”, tha Peleshi.
Ai u kërkoi deputetëve të opozitës të respektonin procedurat parlamentare, duke theksuar se rendi i ditës nuk mund të ndryshohet me presion apo me zhurmë në sallë.
Por deklaratat e kryetarit të Kuvendit shtuan përplasjet. Deputetët e opozitës qëndruan në këmbë dhe bllokuan foltoren, duke vijuar kundërshtimet ndaj zhvillimit të seancës. Bardhi akuzoi drejtuesin e Kuvendit për shkelje të procedurave dhe mosmarrje parasysh të qëndrimit të opozitës.
Situata e tensionuar solli një tjetër ndërprerje të seancës brenda pak minutash. Peleshi kërkoi qetësi dhe u dha deputetëve një pushim të shkurtër.
“Zoti Bardhi, mos e ngrini zërin me mua, ju lutem. Unë nuk jam edukatore. Pesë minuta pushim për qetësim dhe ajrim”, u shpreh Peleshi, duke mbyllur përkohësisht punimet e Kuvendit.
Përplasjet nisën menjëherë pasi kryetari i Kuvendit prezantoi pikën e rendit të ditës për raportimin e veprimtarisë së Avokatit të Popullit, ku opozita e cilësoi këtë proces si një “provokim” ndaj saj.
