Pas tre ditësh heshtje dhe vetëm dy reagimeve telegrafike të Ministrisë së Jashtme, ministri për Europën dhe Punët e Jashtme, Ferit Hoxha, reagoi më në fund publikisht për trajtimin e aktivistëve të flotiljes humanitare për Gazën, mes tyre edhe shtetasin shqiptar Baki Goxhaj.
Në një postim në rrjetet sociale, Hoxha i cilësoi “tronditëse dhe të papranueshme” pamjet e publikuara nga ministri ekstremist izraelit Itamar Ben-Gvir, ku shfaqej trajtimi poshtërues i aktivistëve të ndaluar.
“Të gjithë personat e ndaluar duhet të trajtohen me dinjitet dhe në respekt të plotë të të drejtave të njeriut, ligjit ndërkombëtar dhe ligjit humanitar”, shkroi ministri shqiptar.
Ai shtoi se ambasada shqiptare në Tel Aviv është udhëzuar të qëndrojë në kontakt të vazhdueshëm me autoritetet izraelite për të garantuar asistencën konsullore për shtetasin shqiptar.
Reagimi vjen pasi prej ditësh qeveria shqiptare ishte kritikuar për heshtjen dhe mungesën e një qëndrimi të qartë politik lidhur me ndalimin e aktivistëve të flotiljes në ujërat ndërkombëtare.
Ndërkohë, disa qeveri europiane kishin reaguar më herët duke thirrur ambasadorët izraelitë dhe duke kërkuar shpjegime për mënyrën e trajtimit të aktivistëve.
