Partia Demokratike ka njoftuar se do të kërkojë ngritjen e një komisioni të posaçëm hetimor për zbardhjen e lidhjeve mes politikës dhe krimit. Lajmi u bë i ditur nga deputeti demokrat Edi Paloka, i cili në një konferencë për shtyp deklaroi se ky komision do të quhet Komisioni i së Vërtetës.
Sipas Palokës, bisedat e zbuluara në platforma si Sky dhe Encrochat kanë nxjerrë në pah lidhje të ngushta mes politikës dhe elementëve kriminalë, duke e bërë këtë një çështje jetike për t’u hetuar.
Në orën 15:00 do të mbahet mbledhja e Grupit Parlamentar të PD-së, ku do të vendoset për qëndrimet që do të mbahen ndaj Kuvendit pas arrestimit të deputetit demokrat Ervin Salianji. Deputeti Paloka gjithashtu theksoi se, me përjashtim të tij dhe deputetes Jorida Tabaku, pjesa tjetër e ligjvënësve demokratë nuk ka marrë pjesë në mbledhjet e Komisioneve Parlamentare.
