Deputeti i Partisë Socialiste, Pandeli Majko, i ka kërkuar kryetares së Kuvendit, Elisa Spiropali, që t’i kërkohet Shërbimit Informativ Kombëtar (SHIK) informacion me shkrim mbi akuzat e ngritura dje nga kreu i PD-së, Sali Berisha.
Në një konferencë për shtyp, Berisha deklaroi se Majko është regjistruar nga SHIK me vendim gjykate në një tavolinë ku dyshohej për pazare të trafikut të drogës dhe armëve. Sipas tij, këto regjistrime përfshijnë edhe emrin e deputetit socialist.
Majko ka reaguar përmes një postimi në rrjetet sociale, duke theksuar gatishmërinë e tij për të hequr dorë nga imuniteti parlamentar, me qëllim hetimin e plotë të çështjes.
“Sot, në takim me kryetaren e Kuvendit të Shqipërisë, Elisa Spiropali, i kërkova që, brenda protokolleve në fuqi, t’i kërkohej Shërbimit Informativ Kombëtar informacion me shkrim për aludimet e fshehjes së informacionit të ngritura publikisht nga Sali Berisha. Kam vendosur të dorëzoj çdo imunitet parlamentar, nëse është i nevojshëm për hetimin e çështjes së ngritur ndaj meje,” shkruan Majko.
Nga ana tjetër, Berisha e cilësoi Majkon si një “kriminel të madh elektoral në Kukës”, duke shtuar se dosja në fjalë është e aksesueshme dhe përmban fakte të rënda.
