Në një letër të hapur të iniciuar nga Kryeministrja italiane Giorgia Meloni dhe homologja e saj daneze Mette Frederiksen, nëntë liderë kanë kërkuar një rishinterpretim të Konventës Europiane për të Drejtat e Njeriut.
Nëntë vende të Bashkimit Europian kanë nënshkruar një letër të hapur duke kërkuar që Konventa Europiane për të Drejtat e Njeriut (ECHR) të rishqyrtohet në mënyrë që të mundësohen ndryshime të politikave për migracionin.
Dokumenti u publikua të enjten si pjesë e një përpjekjeje të udhëhequr nga Italia dhe Danimarka. Ai u nënshkrua gjithashtu nga liderë të Austrisë, Belgjikës, Republikës Çeke, Estonisë, Letonisë, Lituanisë dhe Polonisë.
Nënshkruesit, të cilët besojnë se duhet të jetë më e lehtë dëbimi i migrantëve që kryejnë krime, thanë se interpretimi i ECHR-së duhet të shqyrtohet.
"Është e rëndësishme të vlerësohet nëse, në disa raste, gjykata e ka tejkaluar fushëveprimin e konventës në krahasim me qëllimet e saj origjinale, duke ndryshuar kështu ekuilibrin mes interesave që duhen mbrojtur," shkruan ata.
"Ne besojmë se zhvillimi i interpretimit nga gjykata, në disa raste, ka kufizuar aftësinë tonë për të marrë vendime politike në demokracitë tona," shtuan ata.
Mesazhi i tyre vjen në një kohë kur partitë anti-migracion në të gjithë Europën kanë shënuar rritje të popullaritetit në muajt e fundit.
Gjatë një konference për shtyp të enjten me homologen e saj daneze Mette Frederiksen, Kryeministrja italiane Giorgia Meloni tha se letra kishte për qëllim të "hapte një debat politik mbi disa konventa europiane dhe mbi aftësinë e atyre konventave për të trajtuar çështjet e mëdha të kohës sonë, duke filluar pikërisht me çështjen e migracionit."
Në letër, Meloni, Frederiksen dhe bashkë-nënshkruesit e tyre paraqitën disa ndryshime konkrete që do të dëshironin të shihnin.
Propozimet përfshijnë më shumë liri për të vendosur kur të dëbohen shtetas të huaj dhe aftësinë për të ndërmarrë veprime efektive kundër "shteteve armiqësore që përpiqen të përdorin vlerat dhe të drejtat tona kundër nesh... duke instrumentalizuar migrantët në kufijtë tanë".
Konventa, e nënshkruar në vitin 1950 nga Këshilli i Europës, është një traktat ndërkombëtar i krijuar për të mbrojtur të drejtat e njeriut dhe liritë themelore në Europë.
Të gjitha 46 vendet që përbëjnë Këshillin e Europës janë palë në këtë konventë, përfshirë edhe 27 shtetet anëtare të BE-së.
Çdo person, të cilit i janë shkelur të drejtat sipas konventës nga një shtet palë, mund të paraqesë një ankesë në Gjykatë.
