Policia e Tiranës ka arrestuar një person lidhur me protestën e Partisë Demokratike mbrëmjen e së hënës.
Ndërsa tre të tjerë po procedohen në gjendje të lirë. Burime zyrtare të policisë thanë se disa të tjerë janë shpallur në kërkim. Bëhet fjalë per një grup personash të cilët mbrëmjen e kaluar hodhën molotovë ndaj godinës së kryeministrisë, Bashkisë së Tiranës dhe selisë së Ps-së. Po ashtu ata shkatërruan tabelat në rrugë. Si pasojë e këtyre akteve 10 policë u lënduan. Të lënduar mbetën edhe disa protestues. Gjatë protestës policia perdori gaz lotsjellës.
Mosbindja civile sic e cilësoi PD nisi pas dënimit të ish-deputetit demokrat Ervin Salianji për dosjen Babale si dhe vendosjen në arrest shtëpie të ish-kryeministrit Sali Berisha. Opozita kërkon largimin e Edi Ramës si kryeministër dhe hyrjen në zgjedhje me qeveri teknike.
