Kryeministrja italiane Giorgia Meloni ka shprehur kundërshtinë e saj ndaj njohjes formale të Shtetit të Palestinës pa pasur një realitet konkret në terren. Në një deklaratë publike, ajo u shpreh se një veprim i tillë “mund të jetë kundërproduktive ndaj objektivit” të krijimit të një shteti të qëndrueshëm palestinez.
“Unë besoj se njohja e Shtetit të Palestinës, pa ekzistuar një Shtet i Palestinës, në fakt mund të jetë kundërproduktive,” tha Meloni, duke shtuar se këtë qëndrim e ka bërë të ditur më herët edhe në parlament, në komunikimet me Autoritetin Palestinez dhe presidentin francez Emmanuel Macron.
“Nëse diçka që nuk ekziston njihet në letër, problemi rrezikon të duket i zgjidhur, kur në të vërtetë nuk është,” theksoi ajo. Meloni shtoi se është e angazhuar në mbështetjen e një shteti palestinez, por vetëm në kuadër të një procesi real për ndërtimin e tij kushtetues dhe institucional.
