Numri i të diplomuarve në Shqipëri ka pësuar një tjetër tkurrje në arsimin parauniversitar gjatë vitit shkollor 2024-2025, ndërsa universitetet kanë regjistruar një rritje të lehtë të studentëve që përfundojnë studimet. Të dhënat e publikuara nga INSTAT tregojnë se në total janë diplomuar 82.640 nxënës dhe studentë në të gjitha nivelet e arsimit, ku 35% i përkasin arsimit të lartë.
Sipas statistikave, në arsimin parauniversitar janë diplomuar 53.701 nxënës, me një rënie prej 1.5% krahasuar me një vit më parë. Tkurrja është reflektuar sidomos në arsimin e mesëm të lartë, ku numri i maturantëve të diplomuar ra me 3%, në 25.925 nxënës. Ndërkohë, në arsimin 9-vjeçar janë diplomuar 27.682 nxënës, pothuajse në të njëjtat nivele me vitin e kaluar.
Të dhënat tregojnë gjithashtu një dominim të institucioneve publike në diplomime. Rreth 89.3% e nxënësve të arsimit bazë dhe 83.9% e maturantëve janë diplomuar në shkolla publike. Në arsimin profesional, vetëm 12.3% e të diplomuarve të arsimit të mesëm i përkasin këtij profili, ndërsa vajzat mbeten dukshëm më pak të përfaqësuara, me vetëm 15.7% të totalit të diplomimeve profesionale.
Ndryshe nga ciklet parauniversitare, universitetet kanë regjistruar rritje. Gjatë vitit akademik 2024-2025 u diplomuan 28.939 studentë, ose 2.6% më shumë se një vit më parë. Mbi gjysma e tyre, 50.6%, kanë përfunduar programet Bachelor, ndërsa 43.4% programet Master. Femrat vijojnë të dominojnë arsimin e lartë, duke përbërë 65.3% të të diplomuarve. Po ashtu, dy të tretat e studentëve janë diplomuar në universitete publike.
Fushat më të preferuara të studimit mbeten “Biznes, administrim dhe ligj”, ku diplomohen 23.3% e studentëve, e ndjekur nga “Shëndet dhe mirëqenie” me 22.4% dhe “Inxhinieri, prodhim dhe ndërtim” me 14%. Ndërkohë, teknologjia e informacionit dhe komunikimit vijon të mbetet në nivele më të ulëta krahasuar me kërkesën e tregut të punës, duke zënë vetëm 6% të diplomimeve.
Shifrat konfirmojnë vijimin e tendencës së rënies së bazës së nxënësve në arsimin parauniversitar, fenomen i lidhur me emigracionin, uljen e lindjeve dhe tkurrjen demografike, ndërsa universitetet po ruajnë një ritëm më pozitiv diplomimesh, të mbështetur edhe nga zgjerimi i programeve të studimit dhe kërkesa më e lartë për arsim të lartë. /ekofin.al
