Gjykata e Posaçme e Shkallës së Parë shpalli fajtor dhe dënoi Saimir Rosales Rodriguez, kimistin kolumbian të laboratorit të Frakullës në Fier.
Ai u cilësua fajtor për veprat penale “trafikim i narkotikëve”, i kryer në bashkëpunim në formën e posaçme të grupit të strukturuar kriminal, “grup i strukturuar kriminal”, si dhe “kryerja e veprave penale nga organizata kriminale dhe grup i strukturuar kriminal”.
Saimir Rosales Rodriguez është arrestuar në Ekuador, por ende nuk është bërë ekstradimi i tij drejt Shqipërisë.
Rodriguez u shpall në kërkim pasi SPAK zbuloi laboratorin e kokainës në Frakull të Fierit, në banesën e ish-kryekomunarit Viktor Çervanaku. Sasia prej 480 kilogramësh kokainë fshihej në pleh artificial, dhe Rodriguez do të kryente ekstraktimin e saj.
Më herët, për laboratorin e Frakullës janë shpallur fajtorë dhe janë dënuar me 89 vite burg ish-kryekomunari i Frakullës, Viktor Çervanaku, djali i tij Denilson Çervanaku, vëllai Zenel Çervanaku, si dhe Nikolin Gjolena, Klajdi Vrioni, Redion Meshi, Enxhi Ferhati, Marildo Rama, Bledar Matoshi dhe Julian Malaj.
