Emiljano Nina, kushëriri i mbretit të kumarit të zhdukur pa gjurmë, Ervis Martinaj, është vënë në pranga nga policia bashkë me një person tjetër. Nga të dhënat paraprake rezulton se Nina, është arrestuar pranë shtëpisë së Ilir Selmanit. Ky fundit është dënuar me 26 vite burg për vrasjen e ish-policit Santiago Malko, një prej njerëzve të besuar të Martinajt. Por, pak ditë më parë Selmani u lirua nën masën e “arrestit në shtëpi” nga Gjykata e Apelit të Posacëm, për shkak të skadimit të afateve të paraburgimit.
Nina është një eksponent i njohur për policinë, pasi arrestuar në maj të vitit 2023 në zonën e 5 Majit në Tiranë disa muaj pas një aksidenti Diga e Liqenit. Arsyet se përse Nina gjendej tek shtëpia e Selmanit mbeten të paqarta, por fakt është që palët janë në konflikt.
Për t'u kthyer tek Santiago Malko, duhet theksuar se ish-polici është konsideruar si krahu i djathtë i Ervis Martinajt. Malko u ekzekutua më 27 gusht 2019 në Tiranë. Për vrasjen e ish-policit është akuzuar klani kriminal Duka, që drejtohet nga Leonard Duka. Duka dhe Martinaj ishin në përplasje për pazaret që lidhen me lojërat e fatit.
Njoftimi:
Finalizohet operacioni policor i koduar “Road”.
Qarkullonte i armatosur me pistoletë, si pasagjer në një motomjet, në rrugën “Fitnete Rexha”, vihet në pranga 21-vjeçari.
Në pranga edhe drejtuesi i motomjetit, për veprën penale “Moskallëzimi i krimit”.
Sekuestrohet një armë zjarri pistoletë dhe municion.
Shërbimet e Forcës së Posaçme “Shqiponja”, në bashkëpunim me shërbimet e Komisariatit të Policisë Nr. 4, në vijim të kontrolleve intensive për goditjen e paligjshmërisë dhe rritjen e parametrave të sigurisë, finalizuan operacionin policor të koduar “Road”.
Gjatë operacionit, në rrugën “Fitnete Rexha”, u ndalua për kontroll një motomjet me të cilin lëviznin shtetasit E. N., 31 vjeç, drejtues dhe
E. H., 21 vjeç, pasagjer.
Nga kontrolli i ushtruar ndaj shtetasit E. H., në çantën që mbante në sup, u gjet dhe u sekuestrua një armë zjarri pistoletë sëbashku me municion, të cilën dyshohet se e mbante pa leje.
Në përfundim të veprimeve procedurale, u bë arrestimi në flagrancë i shtetasit E. H., 21 vjeç, për veprën penale “Mbajtja pa leje e armëve dhe municionit luftarak”, si dhe i shtetasit E. N., 31 vjeç, për veprën penale “Moskallëzimi i krimit”.
Materialet procedurale iu referuan Prokurorisë, për veprime të mëtejshme.
