Drejtuesi i Byrosë Kombëtare të Hetimit, Joni Keta, është pyetur në Komisionin për Nismat Qytetare, Bashkëpunimin dhe Mbikëqyrjen Institucionale lidhur me operacionin e zhvilluar në Durrës, ku u arrestua një prej personave të dyshuar si figurë kyçe në trafikun e kokainës, Adi Çoba.
Operacioni, i cili u zhvillua pa përfshirjen e Policisë së Shtetit, ka ngjallur diskutime mbi mënyrën e bashkëpunimit mes dy institucioneve ligjzbatuese. Në përgjigjen e tij, Keta u tregua i kujdesshëm, duke theksuar se marrëdhënia me Policinë e Shtetit vijon normalisht dhe se BKH nuk synon të konkurrojë strukturën më të madhe të zbatimit të ligjit në vend.
Sipas tij, hetuesit e BKH-së kanë vepruar brenda kuadrit të procedurës penale, pasi kanë identifikuar personin në kërkim dhe kanë kryer arrestimin.
“Ne kemi bashkëpunim me Policinë e Shtetit dhe nuk kërkojmë të konkurrojmë policinë, pasi ajo është organizata më e madhe ligjzbatuese në vend. Hetuesit e BKH-së kanë vepruar në përputhje të plotë me procedurën penale. Ata kanë konstatuar personin në kërkim dhe kanë kryer arrestimin. Këtë duhet të bëjë çdo hetues”, deklaroi Keta.
Megjithatë, fakti që operacioni u zhvillua pa përfshirjen e Policisë së Shtetit ka ngritur pikëpyetje mbi nivelin e besimit dhe koordinimit mes dy institucioneve. Nëse kjo ishte një zgjedhje e natyrës operacionale apo një pasojë e problematikave të mundshme të besimit brenda strukturave të Policisë së Shtetit, mbetet për t’u vlerësuar në vijim.
