Gjatë raportimit përpara Komisionit për Nismat Qytetare, Bashkëpunimin dhe Mbikëqyrjen Institucionale, kreu i SPAK, Klodian Braho u pyet konkretisht se kush janë politikanët që kanë marrë pjesë në takimin e famshëm në Aruba ku pretendohen takime të grupeve kriminale dhe politikanëve shqiptarë me qëllim pastrimin e parave përmes investimeve në ndërtim dhe tjetërsimit të pronave.
Ivi Kaso: Dosja ka rrjedhur në media. Minimalisht duhet të bëni publik kush ka qenë në takim, i majtë apo i djathtë, me ose pa mandatin e kryeministrit në xhep. Kryeministri ka thënë që SPAK ti nxjerrë ujin e zi falsifikimit të pronave në bregdet. Praktikisht ju ka thënë të investigoni vetëm falsifikimit, jo kush ka shkuar në takim nga qeveria e kush ka përfituar nga ky takim në kompanitë off-shore? Ju pengon ky komunikim i kryeministrit që ju orienton publikisht se duhet të hetoni në një drejtim jo 360 gradë.
Klodian Braho: Nuk etiketojmë dosje me emërtime të tilla, por me numra e data. Nuk dua të ndalem tek çështje konkrete, sepse është në hetim. Ju garantoj se në SPAK nuk mund të ndodhë që të jetë një provë në një dosje dhe ajo provë të lihet aty në gjumë e të mos reagohet. Ato që thuhen nuk janë prova. Kur të përfundojnë hetimet institucioni mund të bëjë një transparencë më të plotë. Nuk komentojmë deklarata e asnjë pale dhe asnjë personi. Për SPAK janë të gjithë të barabartë përpara ligjit.
