Fjalori i Oxfordit e përcakton kuptimin e fjalës ‘koleg’ si ‘një person me të cilin punon në një profesion ose biznes’. Ditët e fundit mes shumë problemeve me drejtësinë, Erion Veliaj ka përdorur çdo mundësi për t’u dukur si i paprekshëm nga SPAK. Madje duke përdorur vend e pa vend dhe termin “koleg”. Ky shkrim i shkurtër ka për qëllim të ndajë se kush janë dhe kush nuk janë kolegët e Erionit bazuar mbi përcaktimin e Oxfordit.
Siç të gjithë e dimë Veliaj nuk punon në SPAK. Sikundër besoj dhe shpresoj që mes tij dhe prokurorëve që po hetojnë çështjen e inseneratorit të Tiranës nuk ka lidhje biznesi. Pra nga përcaktimi që i bën Oxfordi, Veliaj nuk është koleg me prokurorët e SPAK.
As punonjësit e policisë bashkiake që sekuestrojnë mallin e shitësve ambulantë nuk janë kolegët e Erionit. Drejtorët që marrin mallin e sekuestruar dhe e çojnë tek bizneset e tyre, janë të tillë. Sepse edhe nëse nuk bëjnë biznes bashkë, ajo që i bën kolegë është drejtimi i strukturave të ndryshme të institucionit.
Pastrueset e bashkisë, zonjat për të cilat kujtohen veç për ti përdor për foto, nuk janë kolegët e Erionit. Pastruesit e parave të pista, po. Pronarët e inceneratorëve që djegin plehrat gjithashtu. Sepse nëse me zonjat që pastrojnë me fshesë nuk i lidh as profesioni e as biznesi, me të dytët i lidhin minimalisht lejet e ndërtimit apo milionat nga inceneratori që nuk punoi kurrë.
Gazetarët e terrenit nuk janë kolegët e Erionit. Pronarët e mediave në krahun tjetër, po. Edhe në këtë rast nuk janë kolegë në profesion por në biznes. Erioni u jep leje ndërtimi dhe tendera, pronarët e mediave sigurojnë që linja editoriale të rrijë sa më larg korrupsionit të Erionit.
Politikanët janë kolegë të Erionit. Dhe historia e dhjetë viteve të fundit ka treguar që i lidh profesioni dhe biznesi. Saimir Tahiri është një koleg i Erionit. Koleg i Erionit është edhe Ilir Beqja, Arben Ahmetaj, Vangjush Dako, Lefter Koka dhe të tjerë. Të akuzuar për korrupsion dhe blerje votash. Bashkëpunimi i tyre ka qenë në nivelin profesional dhe monetar.
Koleg i Erionit është edhe kryeministri. Koleg në qeveri dhe në bashki. Vetëm në zgjedhjet e shkuara për llogari të kryeministrit Veliaj fitoi duke blerë zgjedhjet në të gjithë qarkun e Tiranës. Inceneratori i Tiranës i bën kolegë edhe në biznes.
Erioni ka kolegë edhe në opozitë të cilët i dhuruan në tavolinë postin e kryetarit të bashkisë në zgjedhjet e fundit duke vendosur me qëllim përballë tij kandidatin më të dobët të mundshëm. Siç kishte kërkuar Erioni.
Erioni e di shumë mirë kuptimi e fjalës “koleg”. Ai me qëllim kërkon të turbullojë ujërat duke u ngatërruar me një përcaktim që është i qartë për të gjithë. Nëse prokurorët e Spak do të ishin kolegë të Erionit, ky i fundit nuk do kishte arsye të frikësohej dhe të gënjente për ta. Nëse gazetarët do të ishin kolegë të Erionit, ky i fundit nuk do ti përçmonte e ti shmangej pyetjeve të tyre. Erion Veliaj vazhdon të mbetet kolegu i Edi Ramës deri sa ky i fundit ta pranojë si të tillë.
Dhe ditën kur të vendosë ta trajtojë si ish koleg, Erioni do kuptojë që kolegë të vërtetë të tij janë ata që Rama i ka flakur ndër vite, për t’u dukur më i pastër se të gjithë ish kolegët e tij!
I takon drejtësisë së re t’i tregojnë Erionit që nuk janë kolegët e Erionit dhe se kolegët e tyre janë prokurë e gjyqtarë të cilët i lidh profesioni dhe jo biznesi dhe t’a dërgojnë Erionin tek kolegët e tij të vërtetë.
Nga Genc Sejko
