Gjykata e Durrësit caktoi masën e sigurisë “arrest me burg” me afat 45-ditor për dy personat që dhunuan kamerierin 18-vjeçar në Mal të Robit në Golem, për shkak se iu kërkoi pagesën për punën e kryer. Florian Habilaj dhe shoku i tij Enold Dragoti akuzohen për veprën penale “plagosje e rëndë me dashje”.
Për Melson Nelën, xhaxhain e kamerierit Genti Nela, masa pritet të zhvillohet në orën 12:30. Nela, sipas policisë, po shkonte të hakmerrej ndaj dhunës së ushtruar mbi nipin nga pronarët e hotelit. Ndaj tij rëndon akuza e armëmbajtjes pa leje, pasi në makinën e tij policia gjeti një kallashnikov dhe 3 karikatorë.
Ngjarja ndodhi 3 ditë më parë, kur kamerieri 18-vjeçar Genti Nela kërkoi pagesën dhe për këtë shkak u dhunua nga bashkëpronarët e hotelit. Për ngjarjen u arrestua Florian Habilaj, 28 vjeç, dhe Enold Dragoti, 20 vjeç, ndërsa Arbër Habilaj, 36 vjeç, është shpallur në kërkim.
Pasi mësoi për ngjarjen, xhaxhai i kamerierit u nis të hakmerrej, por përfundoi në prangat e policisë pasi u kap me armë në makinë. Policia zbuloi më pas se, për të fshehur gjurmët e krimit, DVR-ja ishte hequr dhe kabllot ishin prerë.
