Një studim ndërkombëtar i publikuar në Nature Immunology po ndryshon mënyrën si shkencëtarët e kuptojnë sistemin imunitar të foshnjave dhe fëmijëve të vegjël.
Sipas kërkimit të zhvilluar nga Bambino Gesù Children’s Hospital në bashkëpunim me Boston Children’s Hospital, Columbia University dhe Yale School of Medicine, sistemi imunitar i një të porsalinduri nuk është “i dobët” apo “i papjekur”, por i programuar për ta ndihmuar fëmijën të kalojë nga mjedisi i mbrojtur i mitrës në botën plot mikrobe jashtë saj.
Shkencëtarët thonë se 1000 ditët e para të jetës, nga shtatzënia deri në moshën 2-3 vjeç, janë vendimtare për mënyrën si formohet imuniteti.
Sipas profesorit Paolo Palma, foshnjat nuk kanë ende “qeliza kujtese”, të cilat tek të rriturit krijohen pas infeksioneve apo vaksinave. Pikërisht për këtë arsye, kur fëmijët fillojnë çerdhen apo kopshtin, ata sëmuren shpesh dhe në mënyrë të përsëritur.
Studimi po përpiqet të zbulojë edhe pse disa fëmijë sëmuren më shumë se të tjerët, edhe kur rriten në të njëjtën familje dhe në të njëjtin ambient.
Në kuadër të projektit ndërkombëtar “Ideal”, studiuesit do të ndjekin qindra fëmijë për vite me radhë, duke analizuar vaksinat që ka bërë nëna gjatë shtatzënisë, ushqyerjen me gji, stilin e jetesës dhe faktorët ambientalë.
Sipas të dhënave paraprake, ndotja e ajrit po rezulton një nga faktorët më agresivë për sistemin imunitar të fëmijëve. Ekspozimi ndaj PM10 dhe oksideve të azotit në vitin e parë të jetës lidhet me rritje të bronkiteve, bronkioliteve, infeksioneve të frymëmarrjes dhe frymëmarrjes me fishkëllimë.
Shkencëtarët synojnë që në të ardhmen të krijojnë “vaksinim të personalizuar”, ku strategjitë e mbrojtjes do të përshtaten sipas profilit imunitar të secilit fëmijë, sidomos për ata me rrezik më të lartë për astmë, alergji apo sëmundje kronike.
