Një 43-vjeçar, i identifikuar si Vladimir Topjana, u qëllua për vdekje me një plumb në kokë në Fontanafredda, një komunë në provincën e Pordenones. Viktima, një shqiptar që punonte si shofer në një kompani në Porcia (Pordenone), u ekzekutua teksa ishte ulur në një lokal së bashku me një familjar.
Sipas dëshmitarëve, një makinë tip Audi e bardhë ndaloi pranë lokalit dhe prej saj zbritën dy persona. Mes katër burrave nisi një debat që degradoi në përdorimin e armës së zjarrit nga njëri prej personave që zbriti nga Audi.
Topjana humbi jetën në vend nga një plumb në kokë, ndërsa autori i dyshuar u largua me shpejtësi nga vendi i ngjarjes, bashkë me bashkëpunëtorin e tij.
Policia dhe shërbimet mjekësore ndërhynë menjëherë në vendngjarje. Janë nisur menjëherë kërkimet për identifikimin dhe kapjen e autorëve, ndërkohë që janë marrë dëshmitë e klientëve të shumtë që ndodheshin në lokal në momentin e të shtënave.
Karabinierët kanë arrestuar autorin e dyshuar mes zonës së Saciles (Pordenone) dhe kufirit me Veneton. Ai rezulton të jetë një 30-vjeçar, gjithashtu shtetas shqiptar. Hetimet janë në vijim për të zbardhur motivet e konfliktit mes palëve.
