Italia kërkon të dhëna shtesë nga Prokuroria e Tiranës për të përfunduar aktekspertizën dhe përcaktuar shkakun e vdekjes së 3-vjecarit Brian Spahiu, i cili ndërroi jetë pas ndërhyrjes dentare në klinikën private të mjekut Roland Xhaxho.
Prokurorja e cështjes kërkoi që ekspertiza të kryhej nga ekspertë të huaj, për shkak se sipas institucionit të akuzës, akti i parë i ekspertizës i kryer nga Instituti i Mjekësisë Ligjore, ishte i paplotë dhe për rrjedhojë konkluzioni i pasaktë. Prokuroria shkoi edhe më tej, teksa theksoi se mungonin ekspertët e fushës për të dhënë përgjigje për të gjitha cështjet e ngritura, si dhe ngrinte dyshime për konflikt interesi, përderisa nën hetim janë mjekë, që mund të ushtrojnë ndikim.
Për këto arsye, prokuroria vendosi t’i drejtohej me letërporosi Italisë, por ekspertët atje kanë kërkuar informacion shtesë për rastin, pasi argumentojnë se duke patur të gjithë të dhënat, do të mund të dalin në konkluzion të saktë. Burime pranë prokurorisë thanë për VNA se iu kanë vënë në dispozicion të dhënat e kërkuara përmes e-mailit dhe presin konkluzionet e aktit.
Më herët, ekspertët e IML-së përcaktuan se Spahiu humbi jetën nga mbidoza e narkozës. “Shkaku i vdekjes ka qenë dhënia e lëndës anestetike që ka sjellë vuajtjen qelizore të thellë me mekanizmin e insuficiencës multiorganore të parikthyeshme”, theksohej në aktekspertizë.
Vogëlushi humbi jetën në reanimacionin e pediatrisë në QSUT më 1 tetor 2023, pasu kishte bërë ndërhyrjen në klinikën private të mjekut Xhaxho. Si Roland Xhaxho ashtu dhe e bija Ina kanë mohuar akuzat.
