Policia e Durrësit ka zbuluar një bazë armatimesh gjatë një operacioni të koduar “Baza”, duke arrestuar në flagrancë një 20-vjeçar me inicialet E.P., banues në Manzë.
Sipas Policisë, gjatë kontrollit në banesën e të riut u gjet dhe u sekuestrua një arsenal armësh dhe municionesh, si dhe mjete të tjera që dyshohet se shërbenin për veprimtari kriminale.
Burime policore bëjnë me dije se ekzistojnë dyshime se baza shërbente për furnizimin me armë të grupeve kriminale.
Gjatë operacionit u sekuestruan 4 pistoleta, 1 armë automatike model 56 (kallashnikov), 1 armë gjahu (shotgun), 6 krehëra, qindra fishekë luftarakë të kalibrave të ndryshëm, 1 targë automjeti italiane dhe 1 aparat celular, të cilat u bllokuan në cilësinë e provës materiale.
Sipas Policisë, armët e sekuestruara do t’i nënshtrohen ekspertimit në Institutin e Policisë Shkencore, për të verifikuar nëse janë përdorur në ngjarje kriminale të ndodhura më parë.
Hetimet vijojnë për identifikimin dhe vënien përpara përgjegjësisë ligjore të personave të tjerë që mund të jenë të përfshirë në këtë veprimtari kriminale.
Ndërkohë, 20-vjeçari akuzohet për veprat penale “Prodhimi dhe mbajtja pa leje e armëve, armëve shpërthyese dhe municionit” dhe “Prodhimi dhe mbajtja pa leje e armëve të gjuetisë dhe sportive”.
