Kanë dalë në dritë detaje të reja nga hetimet për skandalin e dyshuar financiar në filialin e Postës Shqiptare në Durrës, ku tre zyrtare janë vënë në pranga nën dyshimet se kanë përvetësuar rreth 69 milionë lekë të rinj, fond i destinuar për pensionet dhe ndihmën ekonomike.
Gjatë seancës për caktimin e masës së sigurisë, prokuroria paraqiti elementë të rinj të dosjes hetimore, duke përmendur edhe frekuentimin e ambienteve të lojërave të fatit nga drejtoresha e filialit, Elisabeta Mataj.
Përpara gjykatës, Mataj nuk e mohoi këtë fakt, por theksoi se nuk kishte shkelur asnjë rregull ligjor apo detyrim kontraktor. Sipas saj, frekuentimi i kazinove nuk përbënte ndonjë shkelje.
"Jam një qytetare e lirë. Më tregoni se në cilën kontratë thuhet se nuk mund të shkoj në lokale, bare apo kazino", citohet të ketë deklaruar ajo gjatë seancës.
Drejtoresha e arrestuar hodhi poshtë edhe pretendimet se kishte tentuar t'i shmangej drejtësisë, duke sqaruar se udhëtimin jashtë vendit e kishte planifikuar më 10 korrik, ndërsa më 13 dhe 14 korrik kishte qenë në vendin e punës.
E pyetur nga trupi gjykues se ku kanë përfunduar fondet që dyshohet se janë përvetësuar, Mataj u përgjigj se nuk kishte dijeni.
Më tej Gjykata vendosi “arrest në burg” për ish-drejtoreshën e filialit, Elisabeta Mataj, ndërsa caktoi masën “arrest në shtëpi” për ish-shefen e financës, Valbona Duni, dhe ish-arkëtaren Paola Dana.
Tre zyrtaret akuzohen për veprat penale “Shpërdorimi i detyrës” dhe “Vjedhja duke shpërdoruar detyrën”, kryer në bashkëpunim.
Ndërkohë, hetimet vijojnë për të përcaktuar mekanizmin e dyshuar të abuzimit, përgjegjësinë e secilës prej të arrestuarave, si dhe destinacionin e rreth 69 milionë lekëve, të cilat ishin planifikuar për t'u shpërndarë qytetarëve në formën e pensioneve dhe përfitimeve sociale.
