Policia e Parisit ka bërë të ditur se për ndeshjen e futbollit mes Francës dhe Izraelit, e cila do të zhvillohet të enjten, do të angazhohen 4000 oficerë policie dhe 1600 pjesëtarë të stafit të stadiumit për të garantuar sigurinë brenda dhe përreth stadiumit, si dhe në transportin publik.
Ky operacion i gjerë sigurie vjen një javë pas incidenteve të dhunshme që shpërthyen kundër tifozëve izraelitë në Amsterdam. Shefi i policisë së Parisit, Laurent Nuñez, deklaroi të dielën se do të vendoset një perimetër sigurie kundër terrorizmit rreth stadiumit dhe se kontrollet e sigurisë do të jenë të përforcuara për të garantuar mbrojtjen e pjesëmarrësve dhe rendin publik.
