Eva Pango ka mbetur e plagosur në fytyrë gjatë protestës së studentëve dhe gjimnazistëve në Tiranë, pasi raportohet se është goditur drejtpërdrejt nga një predhë gazi lotsjellës e lëshuar nga forcat e policisë.
Sipas pamjeve, Eva është shfaqur e gjakosur, me plagë në fytyrë, ndërsa është transportuar me urgjencë drejt Spitalit të Traumës për të marrë ndihmën e nevojshme mjekësore.
Incidenti është regjistruar gjatë ndërhyrjeve të policisë për shpërndarjen e protestuesve, ku forcat e rendit kanë përdorur gaz lotsjellës në disa zona të kryeqytetit.
Plagosja e Eva Pangos ngre shqetësime serioze mbi mënyrën e përdorimit të mjeteve për shpërndarjen e turmave, veçanërisht për rrezikun që paraqesin predhat e gazit lotsjellës kur godasin drejtpërdrejt trupin e protestuesve.
Protesta e kësaj të enjteje është shoqëruar me tensione të forta, përplasje mes të rinjve dhe policisë, si dhe ndërhyrje të vazhdueshme të forcave të rendit.
Ende nuk ka një informacion zyrtar të detajuar mbi gjendjen shëndetësore të Eva Pangos dhe shkallën e dëmtimeve të pësuara.
