Dy versione janë dhënë nga autoritetet lidhur me origjinën e shpërthimit të ndodhur mëngjesin e sotëm në pikën e karburantit “Eida”, në zonën e Bërrylit në Tiranë, ku tre punonjës mbetën të plagosur dhe u shkaktuan dëme të konsiderueshme materiale.
Drejtori i Zjarrfikëses së Tiranës, Shkëlqim Goxhaj, deklaroi se shpërthimi ka ndodhur brenda ambienteve të zyrave të karburantit dhe e lidhi atë me gazin. Nga ana tjetër, Inspektorati Shtetëror Teknik dhe Industrial (ISHTI), bazuar në vlerësimin paraprak të grupit të inspektimit, thotë se zjarri dyshohet se ka nisur nga një automjet brenda territorit të karburantit dhe më pas është shoqëruar me një shpërthim.
Goxhaj bëri të ditur se shërbimi zjarrfikës u njoftua menjëherë në sallën operative, ndërsa në vendngjarje u aktivizuan dy stacionet më të afërta. Forcat zjarrfikëse mbërritën brenda pak minutash, ku konstatuan dëme të mëdha dhe prani flakësh.
“Kemi pasur shpërthim gazi. Është lajmëruar shërbimi zjarrfikës në sallën operative dhe janë aktivizuar dy stacionet që janë më afër. Në pak minuta kanë arritur në vendngjarje dhe është konstatuar se pika e karburantit dhe ambientet e zyrave ishin shembur për shkak të shpërthimit, si dhe kishte flakë. Në pak minuta gjithçka është vënë në kontroll. Shpërthimi ndodhi brenda zyrave të karburantit”, deklaroi Goxhaj.
Një tjetër version mbi origjinën e ngjarjes vjen nga ISHTI, i cili përjashton shpërthimin e rezervuarëve të karburantit dhe ngre dyshimet se zjarri ka nisur nga një automjet.
Në njoftimin zyrtar, ISHTI thekson:
“Nga vlerësimi paraprak i grupit të inspektimit të ISHTI në stacionin e shitjes me pakicë të karburanteve Skënderi G sh.p.k., me vendndodhje tek Brryli, Tiranë, rezulton se: Nuk ka pasur shpërthim të rezervuarëve të karburanteve. Dyshohet se zjarri ka nisur nga një automjet brenda territorit të stacionit të karburantëve, që është shoqëruar edhe me eksplozion.”
Si pasojë e ngjarjes, tre punonjës të karburantit mbetën të plagosur. Ata u transportuan në Spitalin e Traumës dhe, sipas Policisë, ndodhen jashtë rrezikut për jetën. Shpërthimi shkaktoi gjithashtu dëme të konsiderueshme në ambientet e karburantit, ndërsa u dëmtua edhe një automjet.
Pika e karburantit me emrin tregtar “Eida” rezulton e regjistruar si “Skënderi G” sh.p.k. dhe është në pronësi të Frident Kuqit.
Pavarësisht dy versioneve paraprake mbi origjinën e ngjarjes, shkaku përfundimtar i shpërthimit mbetet ende për t’u përcaktuar. Policia dhe autoritetet e tjera po vijojnë hetimet dhe verifikimet për të rindërtuar dinamikën e plotë të incidentit.
