Dorëheqja e parakohshme e rektorit të Universitetit të Shkodrës “Luigj Gurakuqi”, Prof. Dr. Tonin Gjuraj, ka sjellë reagime edhe në radhët e Partisë Socialiste.
Deputetja e PS-së për Shkodrën, Marjana Koçeku, ka shprehur publikisht keqardhjen për largimin e Gjurajt, duke e cilësuar atë si një nga njerëzit që e ka dashur më shumë Universitetin e Shkodrës dhe duke vlerësuar integritetin, vizionin dhe përkushtimin e tij në drejtimin e institucionit.
“Lajmi për dorëheqjen e tij më ngjall keqardhje për qytetin tem. Në një kohë kur universitetet kanë nevojë për personalitete me integritet, vizion dhe kurajë, largimi i tij mund të konsiderohet nji zhvillim jo i mirë”, shkruan Koçeku.
Reagimi merr një peshë të veçantë politike për faktin se Tonin Gjuraj ka qenë më herët deputet i Partisë Demokratike, ndërsa sot mbështetja për të vjen nga një përfaqësuese e mazhorancës socialiste.
Në letrën e dorëheqjes drejtuar Ministres së Arsimit, Gjuraj argumenton se vendimi i tij lidhet me mosmarrëveshjet me Bordin e Administrimit të universitetit. Ai akuzon bordin për vendimmarrje të njëanshme, shkelje ligjore dhe ndërhyrje që, sipas tij, cenojnë autonominë universitare dhe pengojnë proceset e zhvillimit të institucionit.
Edhe pse Koçeku nuk përmend drejtpërdrejt Ministrinë e Arsimit apo Bordin e Administrimit, ajo kërkon “një reflektim institucional” pas këtij zhvillimi, duke lënë të kuptohet se largimi i Gjurajt nuk duhet parë si një çështje personale, por si një problem që prek vetë universitetin.
Dorëheqja e rektorit vjen pas vetëm dy vitesh në krye të Universitetit të Shkodrës, ndërsa debati mbi autonominë universitare dhe rolin e bordeve të administrimit pritet të rikthehet sërish në qendër të vëmendjes.
