Departamenti Amerikan i Shtetit ka konfirmuar se ka lëshuar një përjashtim (waiver) për sanksionin e vendosur ndaj kreut të Partisë Demokratike, Sali Berisha, në kuadër të përcaktimit sipas nenit 7031(c).
Në një reagim të shpërndarë nga Zyra e Shtypit e Departamentit të Shtetit, thuhet se administrata amerikane ka dhënë përjashtime për disa prej përcaktimeve 7031(c) të vendosura nga administrata e mëparshme, pasi një veprim i tillë “i shërben një interesi kombëtar të rëndësishëm”.
“Departamenti i Shtetit ka lëshuar përjashtime për disa përcaktime 7031(c) të vendosura nga administrata e mëparshme, pasi dhënia e këtyre përjashtimeve i shërben një interesi kombëtar bindës”, thuhet në deklaratë.
Formulimi i përdorur nga Departamenti i Shtetit nuk flet për heqjen ose shfuqizimin e vendimit fillestar të shpalljes “non grata”, por për dhënien e një përjashtimi nga zbatimi i kufizimeve të vendosura më parë. Deri më tani nuk është bërë publik asnjë dokument tjetër që të sqarojë nëse statusi i Berishës është hequr plotësisht apo nëse bëhet fjalë vetëm për një përjashtim të posaçëm nga sanksionet ekzistuese.
Lajmi vjen pasi më herët gjatë ditës Berisha njoftoi se pas më shumë se pesë vitesh Shtetet e Bashkuara kanë vendosur t’i heqin pengesat për hyrjen e tij në SHBA.
