Deputetët e Partisë Demokratike, të cilët u përjashtuan një ditë më parë nga punimet e Kuvendit, sot janë ndaluar të futen në sallën e seancave plenare. Garda e Republikës bllokoi hyrjen, duke penguar përfaqësuesit e PD-së të marrin pjesë në seancë.
Deputeti demokrat Flamur Noka akuzoi Kryeministrin Edi Rama se po “bunkerizon” Kuvendin për të penguar opozitën.
“Tmerr ka Edi Rama nga opozita dhe fjala e lirë. Po bunkerizohet parlamenti për të mos lejuar përfaqësuesit e popullit. Shihni këtë pamje dhe pastaj flisni për demokraci,” tha Noka, duke iu referuar masave të marra kundër deputetëve të PD-së.
Kjo situatë vjen pas përjashtimit të deputetëve demokratë nga Kuvendi, një lëvizje që ka tensionuar më tej raportet mes opozitës dhe mazhorancës, duke ngritur pyetje mbi funksionimin demokratik të institucioneve.
