Ditën e mërkurë kur kreu i PD, Sali Berisha, do të paraqitet në SPAK për t’u njohur me akuzën, Partia Demokratike do të organizojë protestë para Prokurorisë së Posaçme.
Lajmin e bën të ditur Sekretari i Partisë Demokratike, Flamur Noka, i cili në një mesazh që i ka drejtuar kryesisë, shprehet që protesta do të organizohet në orën 12:00 dhe u kërkon anëtarëve për t’u mobilizuar për një protest të fuqishme.
“Ditën e Mërkurë në ora 12:00 kryetari i PD Prof Dr Sali Berisha do shkojë pranë organizatës kriminale të SKAP. Të mobilizohemi të gjithe maksimalisht për protestë të fuqishme solidariteti me të drejtën, me të vërtetën, kundër narkodrejtsisë.” – shkruan Flamur Noka në mesazhin e dërguar kryesisë së PD.
Kujtojmë se ish Rithemelimi i drejtuar nga Sali Berisha ka protestuar para Gjykatës së Lartë kur shqyrtohej çështja e vulës dhe logos së partisë. Asokohe Gjykata e Lartë e ktheu për rishqyrtim në Apel shyqrtimin e çështjes. Ndërkohë nuk ndodhi e njëjta gjë kur Gjykata e Apelit mori vendim që vula dhe logoja e PD i kaluan Berishës dhe grupit të Rithemelimit.
Duke parë dy standartet që ka përdor ish Rithemelimi me çështje të mëparshme, thirrja e protestës së nesërme duket se paralajmëron një vendim jo në favor të Berishës.
