Sali Berisha zhvilloi sot një takim online me drejtuesit politikë të qarqeve për zgjedhjet e ardhshme parlamentare. Takimi nuk ishte i njoftuar paraprakisht dhe, mesa duket, prezantimi i drejtuesve të qarqeve nga Edi Rama ka nxitur kundërshtarët e tij politikë të tregojnë "forcën" e tyre në këtë përballje, të cilën Berisha e cilësoi si finalen e tyre politike.
Gjatë fjalës së tij, kryetari i PD-së, Sali Berisha, theksoi se misioni i 12 drejtuesve politikë të qarqeve është shpresa e fundit për vendin, duke argumentuar se shqiptarët sot nuk kanë asnjë alternativë tjetër dhe nuk kanë se kujt t’i drejtohen për të kërkuar ndryshim.
Sipas Berishës, drejtuesit politikë të PD në qarqe përfaqësojnë mundësinë e vetme për të përmbushur pritshmëritë e shqiptarëve.
Gjatë takimit, u vu re se shumica e pjesëmarrësve ishin burra, me përjashtim të kryetares së Lidhjes Demokratike të Gruas, Albana Vokshi, e vetmja grua në takim.
