Belind Këlliçi deklaroi në një intervistë për A2CNN se Sali Berisha nuk ka ambicie personale për t’u rikthyer në postin e kryeministrit, duke e cilësuar angazhimin e tij politik si një “mision” për rikthimin e zgjedhjeve të lira dhe votës së lirë në Shqipëri.
I pyetur mbi pranimin nga Berisha të propozimit të protestuesve për kufizimin e mandateve, deputeti i Partisë Demokratike tha se kreu demokrat ka qenë “tejet i qartë” në qëndrimin e tij dhe se beteja e tij politike nuk lidhet me karrierën personale.
“Zoti Berisha e ka thënë që nuk është në këtë betejë për aspiratë personale, por për rikthimin e procesit elektoral dhe votës së lirë. Ai e ka parë veten si misionar në këtë proces”, u shpreh Këlliçi.
Sipas tij, edhe më herët Berisha kishte lënë të kuptohej se kandidatura për kryeministër do të përcaktohej përmes primareve brenda Partisë Demokratike në rast fitoreje të opozitës.
Megjithatë, deklaratat e Këlliçit bien ndesh me qëndrimet dhe veprimet publike të vetë Berishës në vitet e fundit. Në zgjedhjet e fundit parlamentare, Berisha u paraqit si kandidat i opozitës për kryeministër, ndërsa pas humbjes kandidoi sërish për drejtimin e Partisë Demokratike pa pasur rival në garë.
Po ashtu, në daljet e tij publike, Berisha ka refuzuar vazhdimisht çdo mundësi dorëheqjeje, edhe pas kritikave dhe thirrjeve të protestuesve, duke argumentuar se mandati i tij buron nga vullneti i demokratëve.
Kjo krijon një kontrast të dukshëm mes deklaratës së Këlliçit për mungesë ambiciesh personale dhe rolit dominues që Berisha vazhdon të mbajë në parti dhe në opozitë.
