Një avion pasagjerësh i kompanisë “Azerbaijan Airlines” (AZAL) me 72 persona në bord, përfshirë 67 pasagjerë dhe 5 anëtarë ekuipazhi, është rrëzuar sot pranë qytetit Aktau në Kazakistan.
Sipas Ministrisë së Emergjencave të Kazakistanit, nga aksidenti tragjik kanë mbijetuar 25 persona, prej të cilëve 22 janë dërguar në spital për trajtim mjekësor. Raportohet se gjendja e disa prej tyre është kritike.
Avioni ishte nisur nga Baku me destinacion Grozny-n në Çeçeni, por për shkak të kushteve të këqija atmosferike dhe mjegullës së dendur, fluturimi u devijua fillimisht drejt qytetit Makhachkala në Dagestan të Rusisë. Fatkeqësisht, gjatë uljes emergjente, avioni është përplasur me një tufë zogjsh, duke shkaktuar rrëzimin fatal.
Shërbimet e emergjencës janë ende në vendngjarje duke punuar për të shuar zjarrin dhe për të nxjerrë të mbijetuarit. Ministrja e Shëndetësisë e Kazakistanit, Akmaral Alnazarova, ka deklaruar se janë marrë masa urgjente për trajtimin e të plagosurve.
